朱古力慕絲蛋糕

朱古力慕絲蛋糕

 

咁多年來，我都係第一次親手整母親節蛋糕! 繼上次整朱古力慕絲蛋糕失敗後，就再沒有整過蛋糕。今次記住將淡忌廉放入普通格的雪櫃 (上次冰過的淡忌廉水油分離，打唔起)。呢個蛋糕的中間夾入二片海棉蛋糕，我久經習的海棉蛋糕，(我已經可以整好靚仔的海棉蛋糕)終於大派用場，Good!

 

前一晚整定海棉蛋糕，食譜按此。第二天早上，海棉蛋糕涼透就可以切開幾片了。跟手準備個朱古力慕絲。呢個係無咩難度的動作，食譜上寫忌廉要打起8成，我大概將忌廉的體積打多一倍左右。

我真的好滿意呢個蛋糕，有餅店的水準 (係個蛋糕邊無裝飾到，唔夠靚)，厄得下人 J

 

材料

海棉蛋糕     2片

朱古力片     130G (我用左一半牛奶朱古力，一半60%黑朱古力)

暖鮮奶     50G (我用左朱古力奶)

蛋黃     1隻

糖     30G

淡忌廉     400G

魚膠粉     16G

水     80G

棉花糖/士多啤梨 (蛋糕面裝飾)

 

餅模:

我用左7吋活底蛋糕模 (因為唔係成日整，我無買慕絲模)

 

做法

1.    焗好海棉蛋糕，放涼後橫切二片。

2.    將鮮奶放入小煲內整暖，將朱古力片放入奶內溶化。

3.    蛋黃加糖拌勻，然後加入朱古力漿內，慢火拌勻一至兩分鐘。

4.    淡忌廉用電動打蛋器打至8成備用。

5.    魚膠粉加水拌勻，用熱水座溶備用。 (哈哈，打此食譜時才發覺，原來忘記了放80G水，我只用了少量的水開魚膠粉)

6.    魚膠水放入已放涼的朱古力漿內拌勻，將朱古力漿加入已打起的忌廉拌勻成朱古力慕絲。

7.    將蛋糕邊修剪，放一片蛋糕入餅模內，將一半份量慕絲漿倒在蛋糕上，將適量的棉花糖加在中間，再加入另一塊蛋糕片，及倒入餘下的慕絲。

8.    放棉花糖在蛋糕面上，放入雪櫃2-3小時。(可能因為偏多魚膠粉，加上忘記落水份，所以蛋糕未放入雪櫃已開始凝結)。

9.    士多啤梨變花花 - 我買左D士多啤梨，批左個篤篤位，再在邊切幾下，即成為花花，個樣好得。因為士多啤梨較重，要雪好個蛋糕後才放上面，大功告成!